Proizvod učenika 3.razreda OŠ Marčana ( učiteljica Nina Pliško) za projekt „Kako siješ, tako žanješ!“
Eko, za uvi zog van triba sve ča je u škatuli. Polje i figurini (napro fini), kocka i hartice. I triba van malo veća kumpanija, almeno 4 zogadura jer se zoga u paru.
Figurine stavite jušto lipo na početak. Počinje zogati uni ki dobije najmanji broj na kocki ( mi ćemo fatapošte da bude znapako).
Kad figurina doj na polje kadi je slovo I, jedan iz para drugen mora odglumiti ča je na hartici ku je izvuka – ali na mučeći, samo pantomima, ima vrimena 1 minut (morate biti žvelti!).
Ako progovori i reče ča piše zajno se figurina torniva na početak. Ako lipo špjega i njegov zogadur iz para ugana e onda ustanu kadi su i drugi đir kad hite kocku gredu dalje.
A ako van figurina dojde na polje kadi je nacrtana biljka, e onda van je joh i kataloh!
I tornivate na početak , jer poli tega van se slabo piše. Stali ste na otrovnu biljku ka reste poli nas i sad se tornajte lipo na početak da se doma uperete i javite medigu.
Ki par sve to lipo škapula i dojde prvi do kraja je pobjedija, a svi su naučili kako se nikad poli nas govorilo, a anke o biljkami ke poli nas restu..
A ki još vajk ni, neka raspensa ča su stari govorili. U svakoj izreki je čuda pametnega rečeno!
Koliko smo i kako delali smo špjegali u videima pak si lipo hitite oko… i obavezno, dojdite na ZOH kad bude prezentacija projekta u našoj školi! Mi ćemo vas tamo čekati.
